Bale ekki alvarlega meiddur

Táningurinn Gareth Bale hjá Tottenham er ekki jafn alvarlega meiddur og óttast var eftir að traðkað var á ristinni á honum í leiknum gegn Newcastle á mánudagskvöldið. Bale missir þó af Evrópuleik liðsins gegn Getafe annað kvöld.

Bale er aðeins 18 ára gamall og er einn fárra manna sem hafa leikið vel hjá liðinu í haust. Óttast var að hann hefði ristarbrotnað eftir samstuð gegn Newcastle, en hann er aðeins illa bólginn.

Bale hefur slegið í gegn hjá stuðningsmönnum Tottenham síðan hann kom frá Southampton, en þessi ungi velski landsliðsmaður hefur verið að spila á vinstri kantinum hjá liðinu þrátt fyrir að vera bakvörður að upplagi.  

Tottenham hefur kallað varamarkvörð sinn Ben Alnwick úr láni hjá Luton Town til að vera varamaður fyrir Radek Cerny í næstu leikjum, en enski landsliðsmarkvörðurinn Paul Robinson er meiddur.

Leikur Tottenham og Getafe í Evrópukeppni félagsliða verður sýndur beint á sjónvarpsstöðinni Sýn annað kvöld og hefst útsending klukkan 18:40.