Jol: Við getum enn rétt úr kútnum

Martin Jol stjóri Tottenham lætur það ekki hafa áhrif á sig þó lið hans sé fast í botnbaráttu eftir enn eitt tapið í ensku úrvalsdeildinni í gær.

Tottenham lá 3-1 fyrir Newcastle og enn var það skelfilegur varnarleikur sem öðru fremur gerði liðinu lífið leitt. Jol er þó ekki búinn að missa móðinn.

"Ef allir eru heilir erum við með mjög gott lið og góða vörn. Okkur skortir enn leiðtoga í vörnina en þetta er líka spurning um andlegan styrk. Fyrir tveimur árum höfðum við andlegan styrk, en misstum hann í byrjun síðustu leiktíðar - en liðið kom til baka og vann sér inn sjálfstraust eftir þá byrjun. Menn reyndu hvað þeir gátu til að koma til baka á móti Newcastle, en við fengum á okkur mörk á slæmum tímum," sagði Jol - auðveldlega stjórinn í heitasta stólnum í ensku úrvalsdeildinni.