Newcastle ekki í sama klassa og við

Martin Jol, stjóri Tottenham, er ansi drjúgur með sig þó hans menn séu í bullandi fallbaráttu í ensku úrvalsdeildinni. Tottenham sækir Newcastle heim í leik kvöldsins í úrvalsdeildinni og Jol er búinn að kynda vel undir fyrir leikinn.

Tottenham og Newcastle voru tvö af þeim liðum sem sparkspekingar töldu að yrðu í baráttu um að tryggja sér Evrópusæti á leiktíðinni, en Tottenham hefur reyndar byrjað afleitlega og er í fallsæti.

Martin Jol vill ekki kannast við að Newcastle sé á pari við lið sitt.

"Við erum búnir að vera í Evrópukeppni tvö tímabil í röð en ekki þeir. Því ættu þeir þá að vera á pari við okkur? Það væri frábært fyrir þá að ná í hóp sex eða sjö efstu og það væri góður árangur ef þeir næðu í Evrópukeppni í vor," sagði Jol, en hann hefur skilað Tottenham í fimmta sætið tvö ár í röð.

"Við erum þegar búnir að tryggja okkur Evrópusæti tvö ár í röð. Við erum komnir í riðlakeppnina í Evrópukeppni félagsliða og þeir yrðu örugglega mjög sáttir við að ná þeim árangri. Það sem skiptir máli er hvar maður endar á vordögum og við enduðum fyrir ofan öll þessi lið - eins og t.d. Bolton. Lið eins og Aston Villa og Manchester City yrðu líka sætt ef þau næðu Evrópusæti í vor," sagði Jol.