Grant verður farinn fyrir jól

"Æfingarnar hjá Avram Grant eru grín," segir ónefndur leikmaður Chelsea í samtali við News of the World í dag. Þar gagnrýnir hann þjálfunaraðferðir stjórans og segir hann ekki njóta virðingar leikmanna - hann verði látinn taka pokann sinn fyrir jól.

Chelsea-liðið er í mikilli krísu þessa dagana og eymdin jókst enn í gær þegar liðið náði aðeins jöfnu gegn Fulham á heimavelli, missti Drogba af velli með rautt spjald og John Terry í meiðsli. Chelsea hefur ekki náð sigri í síðustu fjórum leikjum sínum.

Leikmaður liðsins, sem ekki vill koma fram undir nafni, segir við helgarblaðið News of the World að Avram Grant eigi eftir að stoppa stutt við á Brúnni.

"Þegar Mourinho var hérna voru æfingarnar fjölbreyttar og skemmtilegar og hann var alltaf með eitthvað nýtt. Hjá Grant vorum við síðast að rekja boltann í kring um keilur - en margir okkar höfðu ekki gert það síðan við vorum fjórtán ára gamlir," sagði leikmaðurinn.

"Það er ekki möguleiki að Avram endist fram að jólum, því leikmennirnir bera enga virðingu fyrir honum."

Þá heldur blaðið því fram að þjálfarinn Steve Clarke muni hætta hjá liðinu á næstu tveimur vikum vegna ástandsins sem skapast hefur eftir að Mourinho hætti.