Flóð víða um heim

Flóð höfðu áhrif á þúsundir manna víða um heim um þessa helgi. Á Englandi hefur úrhellisrigning orsakað flóð á stórum svæðum og hafa hjálparsveitir unnið sleitulaust að björgunarstörfum. Flóð hafa einnig verið í Asíu en hitabylgja í Suðausturhluta Evrópu gerir íbúum lífið leitt.

Eitthvað hefur sjatnað í flóðunum í Englandi frá því í morgun, en aðstæður eru enn afar slæmar á mörgum stöðum. Gloucesterskíri varð einna verst úti í og í Evesham varð að bjarga fjörtíu manns af annari hæð hótels í bát. Fólkið hafði fengið sér herbergi þar vegna flóðanna og var þar án vatns og matar. Þyrlusveit flughersins bjargaði rúmlega hundrað manns af húsþökum í þorpum sem flæddi yfir.

Rigningin var mest í Pershore, um tvö hundruð kílómetra norðvestur af London. Á einum sólarhring var úrkoma 145 millimetrar sem er nánast þreföld mánaðarúrkoma.

Flætt hefur inn í um áttatíu þúsund byggingar eða heimili og 200 þúsund manns verða beint fyrir óþægindum af völdum flóðanna.Búist er við frekari rigningum út vikuna.

Bresk tryggingarfélög áætla að tjónið hlaupi á um tugum milljarða íslenskra króna

Í Bangladesh orsakaði hellirigning skyndiflóð og að minnsta kosti fjórir létust í óveðri þegar tré féllu á þá. Flóðin skoluðu uppskeru bænda í burtu og ár flæddu yfir bakka sína í austur og suðurhluta landsins. Flóð eru tíð í Bangladesh á þessum tíma þegar Monsoon rigningar standa yfir.

Frá því rigningartímabilið hófst hafa flóð gengið yfir nærri helming héraða í Kína og orðið að minnsta kosti fjögur hundruð manns að bana samkvæmt Xinhua fréttastofunni. Í flóðunum nú hafa 42 látist í Chongqing borg og 12 er saknað.

Á meðan flóð herja á Asíubúa og Breta hefur hitabylgja í suðausturhluta Evrópu orðið 13 að bana í vikunni. Skógareldar geisa víða og skemma uppskeru, meðal annars á Ítalíu, Grikklandi og Bosníu þar sem hitatölur fóru upp í 41 gráðu.

Fólk forðaðist sólina og götur voru nánast auðar. Ferðamenn í Róm áttu í erfiðleikum með að fara í skoðunarferðir vegna hitanna sem voru um 34 gráður með heitum vindi og miklum raka.