Enn tapar KR

KR-ingar sitja enn fastir á botni Landsbankadeildar karla eftir að liðið tapaði 2-0 fyrir nýliðum HK í Kópavogi í kvöld. Keflvíkingar unnu góðan 2-1 útisigur á Víkingi þar sem Guðmundur Steinarsson skoraði sigurmark Keflvíkinga úr vítaspyrnu þegar rúmar 2 mínútur voru komnar fram yfir venjulegan leiktíma.

Jón Þorgrímur Stefánsson kom HK yfir gegn KR eftir rúmlega hálftíma leik á Kópavogsvelli og hinn danski Oliver Jaeger innsiglaði sigur liðsins þegar 20 mínútur lifðu leiks. KR-ingar fengu fjölda færa í leiknum en lánleysi liðsins virðist algjört um þessar mundir.

Mikil dramatík var á Víkingsvelli þar sem Keflvíkingar stálu öllum stigunum í blálokin. Þórarinn Kristjánsson kom Keflvíkingum á bragðið þegar hann skoraði eftir aðeins hálfa mínútu í síðari hálfleik. Sinisa Kekic jafnaði metin fyrir Víking úr vítaspyrnu á 73. mínútu en lét reka sig af velli skömmu síðar. Það var svo Guðmundur Steinarsson sem skoraði sigurmark Keflvíkinga úr vítaspyrnu þegar um tvær mínútur voru komnar fram yfir venjulegan leiktíma.