Rússar ítreka andstöðu sína við eldflaugavarnarkerfi

Sergei Lavrov, utanríkisráðherra Rússlands, ítrekaði í dag varnaðarorð rússneskra stjórnvalda vegna fyrirhugaðs eldflaugavarnarkerfis Bandaríkjamanna í Austur-Evrópu. Hvatti hann Bandaríkjamenn til að fresta allri uppbyggingu kerfisins til frekari rannsókna, ellegar gæti það flækt alvarlega deiluna við Írana um kjarnorkuáætlun þeirra.

Eins og fram hefur komið í fréttum áforma Bandaríkjamenn að byggja upp eldflaugavarnarkerfi í Póllandi og Tékklandi og segjast þeir gera það til þess að geta varist árásum frá Íran og Norður-Kóreu. Vladímír Pútín, forseti Rússlands, brást um síðustu helgi illa við hugmyndunum og hótaði að beina kjarnorkueldflaugum Rússa að evrópskum ríkjum ef Bandaríkjamenn létu ekki af þessum áformum sínum.

Á fundi í Þýskalandi í vikunni lagði Pútín svo til þá lausn í málinu að Rússar og Bandaríkjamenn notuðu saman ratstjárstöð í Aserbaídjad sem á landamæri að Íran. Bush Bandaríkjaforseti sagðist opinn fyrir hugmyndinni en lýsti því svo yfir í gær í Póllandi að stefnt yrði áfram að uppbyggingu eldflaugavarnarkerfisins.

Haft er eftir Seregi Lavrov í rússneskum fjölmiðlum í dag að Bandaríkjamenn ættu að fresta áformunum þar sem þau muni einungis flækja deilurnar um kjarnorkuáætlun Írana. Vesturveldin og Írana greinir á um áætlunina og segja Bandaríkjamenn hana yfirskin til þróunar kjarnavopna en Íranar segjast aðeins ætla að nota kjarnorku í friðsamlegum tilgangi. Sameinuðu þjóðirnar hafa þegar beitt Írana refsiaðgerðum fyrir að neita að hætta að auðga úran sem nota má í kjarnorkuvopn.