Telja hugsanlegt að ETA láti til skarar skríða á næstunni

Aðskilnaðarhreyfing Baska, ETA, hyggst binda enda á rúmlega eins árs vopnahlé á morgun. Telja spænskir fjölmiðlar hugsanlegt að samtökin láti til skarar skríða á næstunni.

Aðskilnaðarsamtökin birtu yfirlýsingu í baskneska dagblaðinu Berria í dag þar sem fram kemur að lágmarksskilyrði fyrir friðarviðræðum við stjórnvöld á Spáni séu ekki fyrir hendi. Þá hafi yfirvöld hafi beitt félaga í ETA ofsóknum og pyntingum í kjölfar vopnahlésins.

ETA lýsti yfir vopnahléi í mars í fyrra og voru vonir bundnar við að sósíalistastjórn Jose Luis Zapatero næði samkomulagi við samtökin. Hafði Zapatero lýst því yfir að Baskar myndu fá að ráða framtíð sinni sjálfir en skoðanakannanir sýna að minnihluti þeirra er fylgjandi aðskilnaði frá Spáni.

Félögum í ETA fannst friðarviðræðurnar á síðasta ári hins vegar litlu skila og því létu samtökin til skarar skríða með sprengjuárás á flugvelli í Madríd í desember í fyrra. Þar létust tveir. Í kjölfarið hættu stjórnvöld öllum viðræðum við samtökin.

Leiða spænskir fjölmiðlar líkur að því að samtökin láti til sín taka á næstunni með sprengjuárás en yfir 800 manns hafa látist í fjögurra áratuga blóðugri baráttu þeirra fyrir sjálfstæði Baskalands.