Búist við að Bush gagnrýni þróunina í Rússlandi

Búist er við því að George Bush Bandaríkjaforseti gagnrýni rússnesk stjórnvöld vegna einræðistilburða þar í landi í ræðu sem hann flytur í Prag í Tékklandi í dag.

Bush kom í gærkvöld til Prag á leið sinni á fund leiðtoga átta helstu iðnríkja heims sem hefst í Þýskalandi á morgun. Hann fundar í dag með foresta og forsætisráðherra Tékklands ásamt því að ávarpa ráðstefnu um lýðræði og öryggi. Meðal gesta þar verður Garrí Kasparov, fyrrverandi heimsmeistari í skák og einn af leiðtogum stjórnarandstöðunnar í Rússlandi.

Búist er við að Bush beini þar spjótum sínum að rússneskum stjórnvöldum og gagnrýni þau fyrir að styðja ekki við lýðræðisþróun í Rússlandi. Bush heimsækir einnig Pólland áður en hann heldur til Þýskalands.

Samskipti Rússlands og Bandaríkjanna hafa versnað að undanförnu vegna þess sem Bandaríkjamenn kalla vaxandi einræði í Rússlandi. Þá deila ríkin einnig um eldflaugavarnarkerfi sem Bandaríkjastjórn vill koma upp í Tékklandi og Póllandi.

Valdímír Pútín brást harkalega við þessum hugmyndum um helgina og hótaði að beina kjarnorkueldflaugum Rússlands að Evrópuríkjum. Við þeim yfirlýsingum hafa NATO-ríkin brugðist hart og sagðist Nicolas Sarkozy, forseti Frakklands, ætla að ræða opinskátt við Pútín á leiðtogafundinum sem hefst í Þýskalandi á morgun.