Styttist í forsetakosningarnar í Frakklandi

Aðeins er tæpur sólahringur þar til að kjörstaðir verði opnaðir vegna forsetakosninganna í Frakklandi. Síðustu kannanir sýna að Nicolas Sarkozy hafi aukið forskot sitt á Segolene Royal.

Kosningabaráttunni lauk formlega í gærkvöldi og birting skoðanakannana og kosningaáróðurs því ekki leyfileg frá og með miðnætti. Í morgun hafa starfsmenn kosninganna haft í nógu að snúast við að undirbúa kjörstaði fyrir morgundaginn. Allt útlit er fyrir að þátttaka í kosningunum verði góð en skráningum kjósenda fyrir kosningarnar hefur fjölgað frá síðustu kosningum.

Ef marka má síðustu skoðanakannanir á Royal talsvert á brattann að sækja. Í könnun dagblaðsins Le Monde sem birt var í gær segjast 53% aðspurðra ætla að kjósa Sarkozy en 47% Royal. Le Figaro metur stöðu Sarkozy enn sterkari, hann fengi 54,4% atkvæða ef kosið yrði nú en Royal 45,5%. Sérfræðingar segja ýmsar skýringar á að forskot Sarkozy hafi aukist, hann virðist til dæmis hafa náð til sín stærri hluta miðjufylgisins.

Fréttastofa Stöðvar 2 verður með beina útsendingu frá París, í kvöldfréttatímanum á morgun, eftir að kjörstöðum verður lokað.