Al Sadr flúinn til Íran

Talið er að Moqtada al Sadr múslimaklerkur og einn valdamesti maður Íraks hafi nú flúið yfir til Íran. Fram kemur á fréttavef ABC-sjónvarpsstöðvarinnar bandarísku að yfirmenn í bandaríska hernum staðfesti þetta.

Talið er að al Sadr sé hræddur um líf sitt nú þegar Bandaríkjamenn hafa hafið herferð gegn uppreisnarmönnum í Írak. Mahdi hersveitir Al Sadr hafa reynst Bandaríkjamönnum óþægur ljár í þúfu og barist hart gegn þeim. Ekki er talið að klerkurinn ætli að láta deigan síga þó hann sé flúinn heldur ætli að halda áfram að skipuleggja andóf frá Teheran í Íran.