O´Shea ætlar að rukka inn bónusinn fyrir að halda hreinu

Írski varnarmaðurinn John O´Shea fékk það erfiða hlutverk að þurfa að standa í marki Manchester United síðustu tíu mínúturnar í sigri liðsins á Tottenham á útivelli. O´Shea viðurkenndi að hann hefði verið ansi taugaveiklaður þegar hann spilaði í fyrsta sinn sem markvörður í ensku úrvalsdeildinni.

"Þetta var nokkuð taugastrekkjandi reynsla fyrir mig, ég verð að viðurkenna það. Sérstaklega þegar ég þurfti nú að verjast hornspyrnu nánast um leið og ég fór inn á völlinn. Í hvert sinn sem Robbie Keane fékk boltann og keyrði í átt að markinu heyrði ég áhorfendur öskra "skjóttu, skjóttu" - svo ég var orðinn nokkuð stressaður," sagði O´Shea, en hann náði að halda hreinu eins og United vann leikinn 4-0.

"Ég veit bara ekki hvort Edwin van der Saar fær bónus fyrir að halda hreinu. Ef hann fær slíkan bónus - ætla ég klárlega að rukka hann um að minnsta kosti helminginn af upphæðinni," sagði O´Shea glaður í bragði við Sky sjónvarpsstöðina eftir leikinn.

Markvörðurinn Edwin van der Sar nefbrotnaði í leiknum og verður líklega eitthvað frá vegna þessa.