United valtaði yfir Tottenham

Manchester United jók í dag forskot sitt á toppi ensku úrvalsdeildarinnar í sex stig á ný eftir sannfærandi 4-0 sigur á lánlausu liði Tottenham á White Hart Lane í dag. Tottenham hélt í við toppliðið allt til loka fyrri hálfleiks þegar Cristiano Ronaldo kom United yfir úr vítaspyrnu sem hann fiskaði sjálfur - en eftir það var leikurinn eign þeirra rauðu.

Vítaspyrnudómurinn þótti nokkuð vafasamur hjá Mark Clattenburg dómara, en þeir Nemanja Vidic og Paul Scholes komu United í 3-0 innan tíu mínútna í síðari hálfleik og það var svo Ryan Giggs sem innsiglaði stórsigur liðsins með marki á 77. mínútu.

Markvörðurinn Edwin van der Sar meiddist í andliti undir lokin þegar United var búið með skiptingar sínar, en John O´Shea tók þá stöðu hans í markinu og náði að halda hreinu það sem eftir var. Sigur United var ef til vill fullstór miðað við gang leiksins, en lið Tottenham hefur valdið miklum vonbrigðum í deildinni í vetur og stendur alls ekki undir þeim væntingum sem til þess voru gerðar í haust.

Lið Manchester United virðist hinsvegar til alls líklegt í vetur og ljóst er að liðið á eftir að veita Chelsea mjög harða keppni um titilinn ef lykilmenn sleppa við meiðsli fram á vorið.