Ledley King meiðist enn

Miðvörðurinn og meiðslakálfurinn Ledley King hjá Tottenham verður væntanlega ekki mikið meira með liðinu á leiktíðinni eftir að í ljós kom að hann er með brákað bein í fæti. Síðast í morgun bárust fregnir af því að fyrirliðinn væri að ná heilsu, en þær reyndust heldur betur rangar og nú verður Lundúnaliðið að vera án King amk næstu tvo mánuðina.

Tottenham hefur ekki riðið feitum hesti í ensku úrvalsdeildinni í vetur og ekki hefur gengið verið skárra í þeim leikjum sem fyrirliðinn hefur verið frá keppni. Þess má geta að Tottenham tilkynnti í dag að það hefði gengið frá samningi við U-16 ára landsliðsmanninn Dean Parrett sem kemur frá QPR og fer í knattspyrnuakademíu félagsins. Parrett þessi er aðeins 15 ára gamall og talinn mikið efni og því er haldið fram að hann hafi kostað Tottenham 2 milljónir punda.