Óvíst að Owen spili á leiktíðinni

Michael Owen segir að vel geti farið svo að hann spili ekkert á þessari leiktíð eftir að hann meiddist alvarlega á hné á HM síðasta sumar. Owen segist fara sér afar hægt í endurhæfingunni og ætlar ekki að taka neina áhættu.

"Stefnan hefur alltaf verið að snúa aftur þegar hnéð er orðið gott. Mér líður vel núna og endurhæfingin gengur mjög vel. Ég hefði sennilega geta byrjað að hlaupa fyrir tveimur eða þremur vikum, en ég hef ákveðið að vera rólegur. Það er enn möguleiki á því að ég snúi aftur í vor - en það getur líka vel verið að ég komi ekki aftur fyrr en á næsta tímabili," sagði hinn 27 ára gamli Owen.