Arsenal í úrslit deildarbikarsins

Tottenham þurfti enn og aftur að sætta sig við tap gegn erkifjendum sínum í Arsenal þegar liðin mættust öðru sinni í undanúrslitaviðureignum sínum í deildarbikarnum á Englandi. Arsenal þurfti þó framlengingu að þessu sinni en vann 3-1 og samanlagt 5-3. Liðið mætir Chelsea í úrslitum.

Sigur Arsenal var aldrei í hættu í kvöld þó fyrsta mark heimamanna kæmi ekki fyrr en á 77. mínútu frá Emanuel Adebayor. Varamaðurinn Mido gerði leikinn áhugaverðan með því að jafna skömmu síðar fyrir Tottenham, en Arsenal skoraði tvö mörk í framlengingu og tryggði sér verðskuldaðan sigur eftir sjálfsmark frá Pascal Chimbonda og mark frá Aliadiere.