Pires ákvað að fara eftir úrslitaleikinn

Franski miðjumaðurinn Robert Pires hefur nú gefið út af hverju hann ákvað að yfirgefa Arsenal á síðustu leiktíð og ganga í raðir spænska liðsins Villarreal. Hann segir Arsene Wenger hafa komið af fjöllum þegar hann tilkynnti honum ákvörðun sína.

"Arsene trúði því ekki þegar ég sagði honum að ég ætlaði að ganga í raðir Villarreal, því hann var viss um að ég ætlaði að vera áfram. Það fyllti mælinn hjá mér þegar mér var skipt af velli strax í byrjun úrslitaleiksins í Meistaradeildinni og eftir það gat ég ekki hugsað mér að vera lengur hjá Arsenal.

Það var gríðarlegt áfall að fá ekki að spila leikinn, ekki síst af því hann var í París. Ég var aðeins í viðræðum við Villarreal þegar þetta átti sér stað, en eftir úrslitaleikinn ákvað ég að slá til og fara. Ég viðurkenni að þetta situr fast í mér, en ég get ekki verið að erfa þetta við Arsene eftir allt sem hann hefur kennt mér og gert fyrir mig," sagði Pires í samtali við The Sun.