Mascherano fær leyfi til að ganga til liðs við Liverpool

Allt útlit er fyrir að að argentínski miðjumaðurinn Javier Mascherano gangi til liðs við enska úrvalsdeildarliðið Liverpool eftir að alþjóðaknattspyrnusambandið, FIFA, gaf honum sérstakt leyfi til þess að fara frá West Ham.

Mascherano gekk til liðs við West Ham frá brasilíska liðinu Corinthians í lok ágúst en samkvæmt reglum FIFA má leikmaður ekki leika með fleiri en tveimur liðum á tímabilinu 1. júlí til 30. júní árið eftir. FIFA hefur sem sagt vikið frá þessari reglu og fær Mascherano leyfi til þess að leika með þriðja liðinu, Liverpool.

Í rökstuðningi FIFA fyrir ákvörðuinni er tekið tillit til þess að knattspyrnutímabilin í Suður-Ameríku og Evrópu skarast. Mascherano hefur aðeins tekið þátt í sjö leikjum West Ham frá því í haust, þar af tveimur heilum, og hefur þráfaldlega lýst yfir áhuga sínum á að yfirgefa félagið.

Reiknað er með að hann geri eins og hálfs árs samning við Liverpool.