Engar breytingar fyrirhugaðar hjá Wenger

Arsene Wenger var að vonum ánægður með baráttuanda varaliðs síns í kvöld sem var óheppið að fara ekki með öll stigin frá White Hart Lane þegar Tottenham og Arsenal skildu jöfn í fyrri leik sínum í undanúrslitum deildarbikarsins. Hann segir ungliða sína hafa unnið sér inn að spila síðari leikinn á heimavelli.

"Tottenham kom mér á óvart í byrjun leiks og spilaði ljómandi vel. Varnarleikur okkar var þá ekki góður og greinilegt að nokkra af mínum mönnum skorti reynslu. Við vorum þó alltaf hættulegir fram á við og í síðari hálfleiknum sýndu menn hæfileika sína og hugrekki. Það hefði verið frábært að ná að skora þriðja markið en við hefðum líklega sætt okkur við 2-2 jafntefli úr því sem komið var í hálfleiknum," sagði Wenger og var síðan spurður hvort hann ætlaði að tefla fram sama liði í síðari leiknum.

"Flestir þeirra verða væntanlega í liðinu. Þeir hafa hæfileikana og viljann til þess og þeir sýndu mér það í síðari hálfleiknum að þeir eiga skilið tækifæri til að spila síðari leikinn," sagði Wenger ánægður.