Hasselbaink sektaður fyrir ummæli í ævisögu sinni

Hollenski framherjinn Jimmy Floyd Hasselbaink hjá Charlton hefur verið sektaður og gefin ströng viðvörun af enska knattspyrnusambandinu fyrir ummæli sín í garð fyrrum félaga sinna í Chelsea í nýútkominni ævisögu sinni.

Hasselbaink hélt því fram í bókinni að leikmenn Chelsea hefðu tekið við ólöglegum bónusgreiðslum frá félaginu eftir sigur þess á Arsenal í fjórðungsúrslitum Meistaradeildarinnar árið 2004. Forráðamenn enska knattspyrnusambandsins létu rannsaka málið eftir þessar alvarlegu ásakanir og komu að tómum kofanum.

Hasselbaink hefur verið sektaður um 5000 pund fyrir ummæli sín og fékk auk þess harða áminningu. Hann hafði áður lýst yfir sakleysi sínu í málinu í ágúst sl.