Rocky veitti leikmönnum Watford innblástur

Adrian Boothroyd, stjóri Watford í ensku úrvalsdeildinni, segir að það hafi verið nýja myndin um Rocky sem veitti leikmönnum sínum innblástur í gærkvöld þegar liðið vann afar sjaldgæfan og mikilvægan sigur. Boothroyd segist vonast til að lið Watford nái að setja á svið endurkomu á borð við þá sem hnefaleikahetjan Rocky hefur nú boðið áhorfendum á hvíta tjaldinu upp á í þrjá áratugi.

"Við höfum ekki unnið marga leiki og því varð ég að reyna að koma upp með eitthvað gott til að reyna að hleypa lífi í strákana. Ég ákvað því að senda þá í bíó að sjá Rocky, því þar er alltaf boðið upp á svo dramatískar endurkomur og öskubuskuævintýri. Ég þarf kannski að gera meira af því að senda strákana í bíó," sagði stjórinn.