Martin Jol ögrar liði sínu

Martin Jol, knattspyrnustjóri Tottenham, hefur nú sent leikmönnum sínum skýr skilaboð í fjölmiðlum fyrir leikina gegn erkifjendunum í Arsenal í enska deildarbikarnum. Fyrri leikur liðanna verður sýndur beint á Sýn í kvöld.

Tottenham hefur ekki riðið feitum hesti frá viðureignum sínum við granna sína undanfarin ár og fátt bendir til að annað verði uppi á teningnum að þessu sinni. Martin Jol hefur því kallað á sína menn til að sýna úr hverju þeir eru gerðir.

"Leikmennirnir eru í fótbolta einmitt til að spila svona leiki og því geta þeir sent út góð skilaboð með frammistöðu sinni í þessum leikjum - eru þeir miðlungsmenn eða eru þeir sigurvegarar? Það langar mig að vita. Það eina sem menn vilja hér er að vinna bikara. Það skilar engu að "geta hugsanlega unnið dollur" - maður verður að vinna þær," sagði Jol.

Síðustu fimm leikir Tottenham og Arsenal:

Arsenal 3-0 Spurs (Des ´06)

Arsenal 1-1 Spurs (Apr ´06)

Spurs 1-1 Arsenal (Okt ´05)

Arsenal 1-0 Spurs (Apr ´05)

Spurs 4-5 Arsenal (Nóv ´04)