Wenger hrósar "ljónunum" sínum

Arsene Wenger var mjög ánægður með sína menn í dag þegar Arsenal náði að leggja Manchester United að velli 2-1 á heimavelli sínum í ensku úrvalsdeildinni. Wenger líkti leikmönnum sínum við ljón.

"Við tryggðum okkur sigur því við gáfumst aldrei upp. Við vorum nokkuð taugaóstyrkir í byrjun á meðan United menn héldu haus, en ég vissi að við næðum að gera atlögu að þeim eftir hlé. United náði forystu úr eina marktækifæri sínu í fyrri hálfleik, en við náðum að koma til baka af því við erum með lið fullt af ljónum," sagði Wenger. Kollegi hans Alex Ferguson var vonsvikinn eftir þriðja tap sinna manna á leiktíðinni.

"Þetta eru vonbrigði af því við vörðumst reglulega vel í dag og náðum að halda aftur af þeim jafnvel eftir að þeir fóru að beita löngum sendingum. Svo fáum við á okkur tvö mörk úr stöðum sem mig óraði ekki að við gætum fengið á okkur mörk. Nú eru nokkrir erfiðir útileikir framundan hjá okkur og þar mun liðið komast á beinu brautina á ný. Ég get fullyrt að við fáum ekki á okkur svona mörk aftur," sagði Alex Ferguson.