Við erum úr leik ef við töpum

Arsene Wenger viðurkennir að lið hans sé úr leik í baráttunni um enska meistaratitilinn ef það tapar fyrir Manchester United á heimavelli á sunnudag. Arsenal er þegar 15 stigum á eftir United, en Wenger segir það ekki þýða að hans menn geti ekki unnið sigur á toppliðinu.

"Ef við töpum gegn United er nokkuð öruggt að við eigum ekki fræðilega möguleika á að verða meistarar, en þetta er hinsvegar kjörið tækifæri fyrir okkur til að minnka muninn í töflunni og það viljum við umfram allt gera. Við erum staðráðnir í að vinna leikinn og vitum að við getum unnið United eftir að við gerðum það á útivelli - og því ættum við þá ekki að geta það heima? Þetta verður eflaust fjörugur leikur, því United mun sækja til sigurs rétt eins og við," sagði Wenger í samtali við Sky sjónvarpsstöðina.