Thatcher skammast sín fyrir árásina

Fanturinn Ben Thatcher sem nú leikur með Charlton, segist enn skammast sín fyrir líkamsárás sína á Pedro Mendes hjá Portsmouth í ágúst síðastliðnum. Thatcher var þá leikmaður Manchester City, en er nú í bullandi fallbaráttu með Charlton.

Charlton mætir einmitt Portsmouth á Fratton Park um næstu helgi og verður það fyrsti leikur Thatcher gegn Portsmouth síðan hann stórslasaði hinn portúgalska Mendes af hreinum og klárum ásetningi. "Ég skammast mín mikið fyrir það sem ég gerði og þetta atvik markaði lægð á ferli mínum. Það er gott að vera farinn að spila aftur og þetta atvik er nú úr sögunni," sagði Thatcher sem fékk aðeins 8 leikja bann fyrir líkamsárásina.