Luque fer ekki til PSV

Glenn Roeder, stjóri Newcastle, hefur skorað á Spánverjann Albert Luque að einbeita sér að því að vinna sér sæti í enska liðinu, því ekkert verði af för hans til PSV Eindhoven í Hollandi eins og til stóð.

Hollenska liðið hefur verið í viðræðum við Newcastle um að fá Luque að láni út leiktíðina, en sá spænski var orðinn mjög leiður á að sitja á tréverkinu hjá Newcastle. Luque hefur skorað aðeins þrjú mörk fyrir þá svarthvítu síðan hann var keyptur á 9,5 milljónir frá Deportivo árið 2005.

"Það verður ekkert af fyrirhugaðri för Luque til PSV, það liggur nú ljóst fyrir, en það þýðir ekkert fyrir hann að fara í fýlu yfir því eins og oft vill verða þegar leikmenn vilja fara frá félagi sínu. Hann verður nú að setja undir sig höfuðið og vinna vel fyrir félagið sitt," sagði Roeder.