Boro ætlar ekki að semja við Viduka í janúar

Forráðamenn Middlesbrough hafa tekið það skýrt fram að félagið muni ekki endurnýja samning sinn við framherjann Mark Viduka fyrr en eftir að janúarglugganum lokar, því samningur hans rennur ekki út fyrr en í sumar.

Gareth Southgate knattspyrnustjóri hefur þegar lýst því yfir að hann vilji halda framherjanum sterka hjá félaginu, en umboðsmaður hans segir vel koma til greina að Viduka fari frá Boro í janúar því félagið hafi ekki boðið honum samning. Forráðamenn Boro ætla hinsvegar ekki að láta neyða sig út í neitt á meðan ekkert tilboð berst í leikmanninn.

"Viduka og umboðsmaður hans vita vel að við viljum framlengja samning hans, en við munum ekki gera það á meðan glugginn er opinn, enda er hann enn með samning við okkur," sagði yfirmaður knattspyrnumála hjá Boro.