Ferguson vill að Mourinho verði áfram

Sir Alex Ferguson, stjóri Manchester United, segist vonast til að keppinautur hans Jose Mourinho verði áfram við stjórnvölinn hjá Chelsea í ljósi þeirra frétta sem gengið hafa á Englandi í dag. Því er haldið fram að Mourinho hætti hjá Chelsea í vor.

Þeir Ferguson og Mourinho hafa á tíðum verið litlir vinir, en þó bera þeir mikla virðingu hvor fyrir öðrum eins og sést á ummælum Alex Ferguson í kvöld. "Ég yrði vonsvikinn ef hann færi frá Chelsea. Ég hef notið samskipta við hann þegar við höfum átt fundi saman eftir leiki og hann er góður persónuleiki sem ég hef gaman af að keppa við," sagði Ferguson og bætti við að hann tæki fréttum af hugsanlegu brotthvarfi Mourinho með fyrirvara.

"Því ætti Jose að vera að segja nokkrum manni frá fyrirætlunum sínum? Ekki myndi ég gera það, því þá þykjast allir vita hvað þú ætlar þér að gera í framtíðinni. Ég tek þessum tíðindum með miklum fyrirvara, enda hef ég fullt í fangið með að sjá til þess að ég sjálfur verði með atvinnu í maí," sagði Ferguson.

Mourinho sjálfur fór undan í flæmingi þegar hann var spurður út í fréttirnar í dag og sagðist aðeins vera að hugsa um næsta leik. "Ég hef aðeins elskað Chelsea í tvö og hálft ár, en ég elska félagið. Ég vil alltaf vinna næsta leik og næsti leikur er við Wigan. Við verðum að gleyma slúðrinu og einbeita okkur að því að vinna. Það er auðvelt fyrir mig að ná mér í gírinn fyrir hvern einasta leik - því ég er alltaf í gírnum - alltaf tilbúinn í slaginn og ef við náum ekki hagstæðum úrslitum, verð ég enn grimmari í að sigra," sagði Mourinho.