Wenger hefur neitað tilboðum í Ljungberg

Arsene Wenger segir að fleiri en eitt lið hafi gert tilboð í sænska miðjumanninn Freddie Ljungberg, en tekur það fram að leikmaðurinn sé alls ekki til sölu. Hann segist einnig hafa fengið tilboð í framherjann Jeremie Aliadiere, en sá er heldur ekki til sölu nema hann krefjist þess að fá að fara frá félaginu.

"Ef menn halda að ég ætli að selja Ljungbert, hafa þeir ekki verið að lesa síðuna okkar, því þar tók ég skýrt fram að hann væri alls ekki til sölu. Sömu sögu er að segja af Aliadiere, nema hvað hann er ungur og efnilegur og ég get ekki haldið honum hérna ef hann krefst þess að fá að spila meira. Hann sýndi það gegn Liverpool að hann getur spilað í þessari deild, en ég veit ekki hvort ég hef úr nógu miklum spilatíma úr að ráða fyrir hann.

Varnarmaðurinn Lauren er sagður falur hjá Arsenal, en hann hefur átt við erfið meiðsli að stríða. "Lauren er að verða búinn með samninginn sinn og er því frjálst að ræða við önnur félög - við getum ekki komið í veg fyrir það," sagði Wenger.