Nóbelsverðlaunahafi vill ekki stjórna landinu

Mohammed Yunus, sem deildi friðarverðlaunum Nóbels með smálánabankanum Grameen sem hann stofnaði, hefur afþakkað að taka við leiðtogasæti í bráðabirgðastjórn heimalands síns Bangladesh. Tilboðið barst Yunus eftir að forseti landsins vék úr forsætisráðherraembætti í bráðabirgðastjórn landsins, eftir hávær mótmæli stjórnarandstöðunnar.

Neyðarástandi var lýst yfir í Bangladesh í gær. Miklar óeirðir hafa verið í Bangladesh undanfarnar vikur vegna óánægju stjórnarandstöðunnar, sem sakar stjórnina um spillingu og kjörstjórnina um óeðlilega starfshætti. Þingkosningunum, sem átti að halda þann 22. janúar næstkomandi, hefur því verið frestað um óákveðinn tíma.