Mourinho fær stuðningsyfirlýsingu

Forráðamönnum Chelsea virðist vera nóg boðið af endalausu slúðri bresku pressunnar um framtíð knattspyrnustjórans Jose Mourinho hjá félaginu, því í kvöld birti liðið stuðningsyfirlýsingu við stjórann og fullyrt er að hann fari hvergi á næstunni.

Í yfirlýsingunni segir m.a. að allir innan raða félagsins styðji knattspyrnustjórann 100% og að fréttaflutningur af viðræðum félagsins við ítalska þjálfarann Marcelo Lippi séu þvættingur.

Mourinho sjálfur tekur blaðaumfjöllun með stóískri ró eins og honum einum er lagið. "Ég þarf ekki að vera að velta mér upp úr framtíð minni hjá félaginu því ég er samningsbundinn til ársins 2010 og ég hef fulla trú á því að ég verði enn við stjórnvölinn hér í sumar og alveg fram til ársins 2010. Ef það sem blöðin eru að skrifa um mig er satt - eru 11 menn að bíða eftir að taka við starfi mínu, en ég læt svona lagað ekki hafa áhrif á mig," sagði Mourinho.

Ólíklegt verður að teljast að starf Mourinho sé í hættu þó gengi liðsins hafi oft verið betra, en fréttir af stirðum samskiptum Mourinho við eiganda félagsins gerast æ háværari. Á móti kemur að það er vel þekkt í knattspyrnuheiminum sem og annarsstaðar að oft hafa stjórar einmitt fengið að taka pokann sinn fljótlega í kjölfar stuðningsyfirlýsinga á borð við þessa.