Súludans í flugi

Flugfarþegum á Gatwick flugvelli á Bretlandi er nú fagnað með risavaxinni auglýsingu um súludans, í óþökk margra þeirra. Eftir flugtak frá flugvellinum má sjá risaauglýsinguna sem máluð hefur verið á akur í Surrey. Auglýsingin er nánast ósjáanleg á jörðu niðri, en mjög skýr úr lofti. Yfirvöld segja auglýsinguna ólöglega og ekki hafi fengist tilskilin leyfi fyrir henni. Markaðsfyrirtækið á bakvið auglýsinguna segir hins vegar að þar sem auglýsingin sjáist einungis úr lofti hafi staðaryfirvöld ekkert með málið að gera. Breska dagblaðið Daily Mail telur að fyrirtækið eigi yfir höfði sér himinháar sektir vegna uppátækisins.