Fastasta skot allra tíma?

Stuðningsmenn Newcastle eru enn að tala um þrumufleyg framherjans magnaða Obafemi Martins í sigurleik liðsins gegn Tottenham um síðustu helgi. Samkvæmt grein í breska blaðinu Telegraph, er þetta fastasta skot sem mælst hefur í ensku knattspyrnunni frá upphafi.

Þrumufleygur Martins með vinstri fæti var mælt á 84 mílna hraða, eða um 134 kílómetra hraða. Enska knattspyrnusambandið hefur staðfest að þetta sé eitt fastasta skot sem mælst hefur í leik, en breska sjónvarpið greindi frá því í þætti sínum Recordbreakers fyrir nokkrum misserum að skot eitt frá Nicky Summerbee árið 1994 hefði mælst á 87 mílna hraða á klukkustund.

Til að gefa rétta mynd af skothörku Martins má geta þess að skot leikmanna Manchester United voru mæld fyrir skömmu og þar mældust skot leikmanna á borð við Cristiano Ronaldo, Paul Scholes og Wayne Rooney á um 70 mílna hraða.

Brasilíumaðurinn Roberto Carlos hjá Real Madrid hefur um árabil verið þekktur sem ein rosalegasta langskytta heimsins, en bombur hans blikna þó í samanburði við þrumufleyg Martins, því skot Carlos voru eitt sinn radarmæld á "aðeins" 72 mílna hraða. Það þykir enda enn merkilegra að skot Obafemi Martins skuli hafa komið í miðjum leik.