Edgar Davids: Jol varð að víkja

Edgar Davids, fyrrum leikmaður Tottenham, segir að ekkert hafi geta komið í veg fyrir að landa sínum Martin Jol yrði sparkað frá Tottenham. Árangur liðsins hafi hreinlega verið óásættanlegur.

Davids spilaði 44 leiki undir Jol í tíð sinni hjá Tottenham og segir liðið ekki hafa bætt sig síðan. "Skoðun mín á stöðu mála hjá Tottenham er alveg skýr. Ég þekki þetta lið og þarna eru miklir hæfileikamenn. Lið með þessa hæfileikamenn á líka að standa sig. Kannski er bara eitthvað að í skipulaginu hjá félaginu. Ef lið eins og þetta er ekki að standa sig er samt eðlilegt að menn horfi fyrst til knattspyrnustjórans. Það er staðreynd," sagði Davids. Honum finnst liðið ekki hafa bætt sig síðan hann fór frá því.

"Við vorum að spila meginlandsbolta þegar ég var þarna og þá náðum við fimmta sæti, en núna er liðið í bullandi vandræðum og útlit fyrir að það nái ekki svo hátt í töflunni á þessu tímabili," sagði Davids.