Jónaðar treyjur Portsmouth virka

Enska úrvalsdeildarliðið Portsmouth hefur staðið sig vonum framar í haust og margir vilja meina að það sé ekki síst að þakka framúrstefnulegum fatnaði liðsins.

Portsmouth klæðist þannig jónuðum æfingafatnaði sem sló í gegn á HM í ruðningi á þessu ári. Þar klæddist landslið Suður-Afríku slíkum fatnaði og vann nokkuð óvæntan sigur í keppninni.

Markaðsfulltrúar hafa kallað treyjurnar "stera í formi fatnaðar" því það þykir vísindalega sannað að treyjurnar skili leikmönnum meira þoli, auknum krafti og þar með bættri frammistöðu á knattspyrnuvellinum.

Án þess að fara út í of flókna efnafræði virkar fatnaðurinn þannig að neikvætt hlaðnar jónir í fatnaðinum hlaðast inn í líkamann og auka þannig blóðflæði. Aukið blóðflæði skilar þannig meira súrefni í vöðvana og bætir kraft og úthald. Þá losnar mjólkursýra einnig hraðar úr líkamanum vegna hins aukna blóðflæðis.

Þessar jónuðu treyjur eru byggðar á gömlum japönskum fræðum sem voru vísindalega þróuð í kommúnistaríkjum Evrópu á millistríðsárunum. Það var svo endanlega amerískt fyrirtæki sem kom tækninni á kortið og hóf að hanna búnað fyrir sundmenn.

Framleiðslan er kölluð IonX og hefur valdið fjaðrafoki í ruðningsheiminum þar sem nokkrar þjóðir fóru fram á að bann yrði lagt á notkun fatnaðarins þar sem hann væri ólöglegur. Lyfjaeftirlitið rannsakaði málið en gat ekki fundið neitt í fatnaðinum sem bryti í bága við reglur.

Forráðamenn Portsmouth hafa nú gert samning við framleiðanda IoneX og vonast til að geta haldið einkaleyfi á notkun hans sem lengst - því rannsóknir sýna að efnið virki í raun og veru.

Það þótti Portsmouth-mönnum endanlega sannað þegar gamli skröggurinn Harry Redknapp féllst á að samþykkja að líklega væri búningurinn að blása lífi í leikmenn hans.

Daily Mail greindi frá þessu.