Arsenal áfram á toppnum

Arsenal heldur toppsætinu í ensku úrvalsdeildinni eftir sanngjarnan 1-0 sigur á grönnum sínum í West Ham á Upton Park í dag. Robin Van Persie skoraði sigurmark gestanna snemma leiks.

Arsenal spilaði ekki sama fallega boltann og það hefur gert í deildinni undanfarið en heimamenn ógnuðu þeim þó ekki verulega í dag. Liðið varð fyrir áfalli þegar það missti Alexander Hleb meiddan af velli eftir harða tæklingu.

Dean Ashton og Freddie Ljungberg áttu bestu færi West Ham í leiknum og vildi stjórinn Alan Curbishley meina að löglegt mark hafi verið dæmt af fyrrum Arsenal-manninum Ljungberg.

"Hann var klárlega réttstæður þegar hann skoraði og ef markið hefði staðið hefði það þýtt allt annan leik en við fengum í dag," sagði Curbishley.

Arsene Wenger var hinsvegar fyrst og fremst feginn að ná loks í stig á Uptn Park. "Okkur hefur ekki gengið vel að ná í stig hérna og því var þetta kærkominn sigur. Það var prófraun fyrir okkur að þurfa að verja 1-0 forystu án þess að gera mistök og mér finnst liðið vera að þroskast," sagði Wenger.