Stóraukinn herstuðningur Bandaríkjanna við Mið-Austurlönd

Háttsett bandarísk sendinefnd er nú á leið til Mið-Austurlanda, eftir að bandaríkjamenn staðfestu áætlanir sínar um að stórauka vopnasölu til Ísraels, Egyptalands og Sádi Arabíu, vinaþjóða sinna í Mið-Austurlöndum

Condoleezza Rice, utanríkisráðherra Bandaríkjanna og Robert Gates varnarmálaráðherra munu hitta leiðtoga arabaríkjanna í Sharm el-Sheikh í Egyptalandi. Rice sagði við blaðamenn á Írlandi, þar sem hún kom við á leiðinni, ferðina vera farna til að smala saman bandamönnum til að vinna gegn áhrifum Írans og Sýrlands, og hópa eins og Hezbollah samtakanna.

Hún sagði ekki vera vafa á því að Íran væri mesta vandamál Bandaríkjanna sem stæði og ógn við það ástand sem þau vildu hafa í mið-austurlöndum.

Bandaríkin munu á næstu tíu árum selja löndunum vopn fyrir rúma sextíu milljarða bandaríkjadala. Meðal þeirra eru eldflaugavarnarkerfi, háþróaðar orrustuþotur og herskip.

Gerfihnattastýrðar sprengjur sem verða seldar Sádi Arabíu og er það í fyrsta sinn sem Bandaríkin selja arabalandi slík vopn.

Stjórnvöld í Íran segja að fjárstuðningurinn sé til þess að ýfa upp ástandið í Miðausturlöndum og að bandaríkin hafi alltaf haft það á dagskránni að valda ótta, og eyðileggja samskipti landanna þar.

Bandaríska þingið þarf að samþykkja vopnasölusamninginn, og hafa að minnsta kosti tveir þingmenn demókrata lýst því yfir að þeir muni reyna að koma í veg fyrir hann.