Ramos stýrir sínum fyrsta leik í kvöld

Juande Ramos verður í fyrsta skipti við stjórnvölinn hjá Tottenham þegar liðið mætir 1. deildarliðinu Blackpool í 16-liða úrslitum ensku deildabikarkeppninnar.

Það verður væntanlega mikilvægt að Tottenham komi sér á rétta braut og forðist neyðarlegt tap í bikarkeppninni í kvöld. Ramos mun síðan einbeita sér að því að koma Tottenham frá fallsvæðinu í ensku úrvalsdeildinni.

Ætla má að Ramos hafi ekki mikið séð til lið Blackpool í gegnum tíðina en hann segir sjálfur að það skipti litlu máli.

„Það skiptir engu máli hvaða leikur þetta er. Hann gæti verið í Afríku eða hvar sem er. Við verðum hins vegar að vinna þennan leik."

Fleiri stórlið verða í eldlínunni í kvöld. Robbie Fowler og félagar í Cardiff mæta á hans gamla heimavöll, Anfield, þar sem honum verður væntanlega vel tekið af stuðningsmönnum Liverpool

Þá mætir Arsenal Sheffield United á útivelli og Chelsea tekur á móti Leicester.

Tveir úrvalsdeildarslagir eru einnig í kvöld. Bolton tekur á móti Manchester City og Portsmouth mætir Blackburn á heimavelli.

Leikir kvöldsins:

Sheffield United - Arsenal (í beinni á Sýn klukkan 19.40)

Chelsea - Leicester

Luton - Everton

Portsmouth - Blackburn

Bolton - Manchester City

Liverpool - Cardiff

Tottenham - Blackpool