Launaseðill Riise veldur fjaðrafoki

Liverpool hefur hrundið af stað rannsókn eftir að meintur launaseðill norska landsliðsmannsins John Arne Riise rataði í rangar hendur og er nú til sýnis á netinu.

Launaseðillinn hefur að geyma nákvæma sundurliðun á launum leikmannsins og á honum kemur fram heimilisfang hans og aðrar viðkvæmar upplýsingar.

"Við tökum þessu mjög alvarlega og erum með málið í rannsókn," sagði talsmaður Liverpool í samtali við breska ríkissjónvarpið í dag.

Samkvæmt launaseðlinum er Riise með rúmar 17 milljónir króna á mánuði í laun og fær tæpa hálfa milljón í bónusgreiðslur fyrir spilaða leiki. Dregið er af honum vegna námslána, en hann fær líka tæplega 2 milljónir í bónus fyrir að spila leiki í Meistaradeildinni.

Samkvæmt seðlinum er Riise með 6,9 milljónir útborgað fyrir mánuðinn þegar allt hefur verið dregið af honum.