Liðið skortir sjálfstraust

Jose Mourinho viðurkenndi að sína menn hefði einfaldlega skort sjálfstraust í dag þegar Chelsea tapaði 2-0 fyrir Liverpool. Rafa Benitez var að vonum ánægður með sína menn þegar hann landaði sigri í 100. deildarleik sínum með þá rauðu.

"Varnarmistökin sem við gerðum í upphafi leiks má rekja til þess að menn eru ekki búnir að aðlagast þeim stöðum sem þeir eru að spila. Liðið er brothætt um þessar mundir og menn skortir sjálfstraust. Við spiluðum betur í síðari hálfleik, en Liverpool varðist vel og lið þeirra var fullt sjálfstrausts. Þeir gátu líka leyft sér að sækja á okkur því þeir vissu að við værum veikir fyrir varnarlega," sagði Jose Mourinho.

"Þetta voru þrjú stig í safnið og ég er mjög sáttur við stöðuna. Við eigum eftir heimaleiki gegn Manchester United og Arsenal og sjálfstraustið er í botni hjá strákunum. Ég hafði alltaf góða tilfinningu fyrir þessum leik og mér fannst sem við ættum skilið að sigra í dag - hvort sem það tengist vandræðum Chelsea í varnarleiknum eða ekki," sagði Rafa Benitez.