Neill fer til West Ham

Breska sjónvarpið greindi frá því í dag að ástralski landsliðsmaðurinn Lucas Neill hefði ákveðið að ganga í raðir West Ham frá Blackburn, en þar hafi honum verið boðinn allt að helmingi hærri samningur en hjá Liverpool.

Kaupverðið er sagt vera í kring um 1,5 milljón punda, en sagt er að hann muni fá um 60.000 pund í vikulaun hjá félaginu. "Þetta snerist ekki um launin þegar upp var staðið, heldur hlutverkið sem ég átti að fá hjá nýju félagi. West Ham er búið að reyna mikið að fá mig og þar á ég möguleika á að spila reglulega. Liverpool gerði mér bara eitt tilboð og það var ekki sérlega freistandi, þó vissuega væri freistandi að spila með stórliði sem ég hélt með í æsku," sagði Neill.