Valur: Þriðja árið hans Willums

Fréttablaðið heldur áfram að telja niður að Íslandsmótinu í knattspyrnu og við spáum Valsmönnum þriðja sætinu. Í fyrra náðu Valsmenn að halda sæti sínum meðal þriggja bestu liðanna í fyrsta sinn síðan árið 1988 og voru í raun aðeins nokkrum sekúndum frá því að vinna KR í lokaleiknum og hreppa þar með 2. sætið annað árið í röð.

Valsmenn hafa áfram verið duglegir á félagskiptamarkaðnum og breiddin í liðinu er meiri en í fyrra. Helgi Sigurðsson kom frá Fram og spilar sína fyrstu leiki í efstu deild á Íslandi í tíu ár og Valsmenn vonast til að eignast í honum langþráðan tíu marka mann. Enginn skoraði fleiri en sex mörk í Valsliðinu síðasta sumar. Liðið gerði átta jafntefli í síðustu tólf leikjum sínum í deildinni og vantaði þar tilfinnan­lega leikmann til að gera út um leikina.

Willum Þór Þórsson hefur gert frábæra hluti með Valsmenn og komið Hlíðarendaliðinu í hóp bestu liða landsins eftir áratuga fjarveru. Þriðja árið er hins vegar runnið upp hjá Willum Þór og ef þjálfaraferill hans er skoðaður eru það ekki alltof góðar fréttir fyrir Valsmenn. Undir hans stjórn voru Þróttarar næstum því fallnir niður í C-deild á hans þriðja ári sumarið 1999 og KR-ingar enduðu í 6. sæti sumarið 2004 eftir að Willum Þór hafði gert þá að Íslandsmeisturum tvö ár á undan.

Þetta er stórt sumar fyrir Valsmenn, sem komast loksins heim á Hlíðarenda í haust eftir að hafa spilað á Laugardalsvellinum undanfarið. Heimavallarleysið háir Valsmönnum því sem fyrr en takist Willum að brjótast út úr álögum þriðja ársins hefur liðið alla burði til þess að berjast um titilinn líkt og undanfarin tvö ár.

Lykilmaðurinn

Atli Sveinn Þórarinsson er áfram í leiðtogahlutverki í Valsvörninni og ber auk þess fyrirliðabandið í forföllum Sigurbjörns Hreiðarssonar. Atli hefur leikið mjög vel undanfarin tímabil og á mikinn þátt í að Valsmenn hafa bara fengið á sig 34 mörk undanfarin tvö sumur. Atli er stór og sterkur leikmaður sem gerir fá mistök og er skynsamur í öllum sínum aðgerðum. Samvinna Atla og Barry Smith gekk mjög vel í fyrra og Valsliðið tapaði ekki deildarleik eftir að þeir fóru að spila hlið við hlið.

X-Faktorinn

Guðmundur Benediktsson hefur verið aðalhönnuður Valssóknarinnar undanfarið og hefur gefið 19 stoðsendingar síðustu tvö sumur. Guðmundur er ekki að verða yngri og meiðslahrjáður ferill hefur tekið sinn toll. Haldi hann út og taki jafnvel upp á því að fara að nýta færin sín aftur fara Valsmenn langt.

Okkar einkunn

Þjálfari 8

Markvarsla 8

Vörn 9

Miðja 9

Sókn 8

Breidd 8

Liðsstyrkur 9

Heimavöllur 3

Áhorfendur 7

Hefð/Reynsla 8

Gengi síðustu ára

2006 3. sæti

2005 2. sæti

2004 1. sæti (B-deild)

2003 10. sæti

2002 1. sæti (B-deild)

2001 9. sæti

Gengi á vormótunum

10 sigrar

0 jafntefli

4 töp