Krefjast þess að Abu Omar verði sleppt

Al-Jazeera fréttastöðin hefur undir höndum upptöku frá samtökum sem segjast hafa Alan Johnston, fréttamann BBC, í haldi en honum var rænt í Gaza borg í Palestínu tólfta mars síðastliðinn. Samtökin kalla sig Her Íslams og þau krefjast þess að Bretar sleppi múslimska klerknum Abu Omar sem situr í fangelsi í Bretlandi. Omar, sem hefur verið kallaður andlegur leiðtogi Al-Kaída í Evrópu, var hnepptur í varðhald í kjölfar sprengjuárásanna í London árið 2005.

Breska ríkisútvarpið rannsakar nú hvort upptakan sé ekta, en á henni má sjá myndir af starfsmannaskírteini Johntons.