Green var hetja West Ham

Portsmouth mistókst í kvöld að komast í hóp fjögurra efstu liðanna í ensku úrvalsdeildinni eftir að liðið gerði markalaust jafntefli við West Ham á heimavelli sínum.

Það var markvörðurinn Robert Green sem var hetja West Ham í kvöld, en hann varði vítaspyrnu frá Benjani í uppbótartíma. Hermann Hreiðarsson var á sínum stað í liði Portsmouth, sem var mun betri aðilinn í leiknum í dag. Þó gerði Perúmaðurinn Nolberto Solano sig sekan um að klúðra tveimur dauðafærum fyrir Hamrana.

Manchester United er á toppi deildarinnar með 26 stig eftir leiki dagsins og Arsenal er í öðru sæti með 25 og á tvo leiki til góða. Manchester City er í þriðja sætinu með 22 stig þrátt fyrir skellinn gegn Chelsea í dag, en þeir bláklæddu eru einmitt í fjórða sætinu með 21 stig. Liverpool er í fimmta sæti með 19 stig líkt og Portsmouth, en Liverpool á tvo leiki til góða.