Garcia er miður sín

Spánverjinn Luis Garcia hjá Liverpool segist vera gjörsamlega miður sín vegna meiðslanna alvarlegu sem hann varð fyrir á hné í leik Liverpool og Arsenal í deildarbikarnum á dögunum. Hann segist sérstaklega fúll yfir að missa af leikjunum við Barcelona í Meistaradeildinni.

"Ég er alveg í rusli yfir þessum meiðslum. Ég hef aldrei meiðst alvarlega á ferlinum og því er þetta erfitt við að eiga. Við hjá Liverpool höfum verið gríðarlega óheppnir með meiðsli síðustu ár og kannski spilar álagið yfir jólavertíðina þar stórt hlutverk. Það er líka sérstaklega erfitt fyrir mig að missa af leikjunum við Barcelona í Meistaradeildinni, því ég var farinn að hlakka til að spila gegn mínum gömlu félögum. Nú þarf ég að horfa á leikinn þjáður í sjónvarpinu," sagði Garcia í dag.