Drogba viðurkennir titring í herbúðum Chelsea

Fílstrendingurinn Didier Drogba hjá Chelsea segir að vissulega hafi verið titringur í herbúðum félagsins að undanförnu, en segist styðja knattspyrnustjórann sinn í einu og öllu.

"Það er smá spenna í herbúðum félagsins þessa dagana og það er fljótt að sjást á liðinu ef er titringur í brúnni," sagði Drogba og lýsti í framhaldinu yfir stuðningi við knattspyrnustjóra sinn Jose Mourinho.

"Hvernig í ósköpunum ætti ég að gera annað en að standa á bakvið mann sem hefur alltaf sýnt mér stuðning og hefur hjálpað mér að vinna titla? Chelsea hefur oft verið með góða leikmenn í sínum röðum, en liðið fór ekki að landa titlum fyrr en Mourinho kom hingað," sagði Drogba og bætti við að lykilatriðið fyrir leikmenn Chelsea væri að standa saman á næstu vikum meðan liðið rifi sig upp úr öldudalnum.