Ég er enginn Jose Mourinho

Breska helgarblaðið News of the World hefur það eftir Juande Ramos í dag að hann vilji ólmur fá þá Freddie Kanoute og Daniel Alves til Tottenham frá Sevilla. Þá er hann einnig sagður vilja fá varnarmanninn Julien Scude og markvörðinn Andres Palop til Englands.

"Ég væri til í að kaupa Alves og Kanoute því þeir myndu nýtast hvaða liði í heiminum vel - en ég er ekki viss um að Sevilla tæki vel í það," sagði Ramos í samtali við News of the World.

Ramos sagði Sunday Mirror að Tottenham hefði ekki verið eina félagið sem reyndi að fá hann til Englands. "Mig hefur alltaf dreymt um að þjálfa á Englandi og Manchester City vildi fá mig í sumar, en þá gat ég ekki farið til Englands. Nú vildi Tottenham fá mig og ég samþykkti það," sagði Ramos.

Bresku blöðin hafa gert mikið úr því að hinn mistæki markvörður Paul Robinson hjá Tottenham sé nú valtur í sessi eftir að skipt var um mann í brúnni á White Hart Lane. Ramos segir að enginn sé öruggur með sæti sitt í liði Tottenham, en vill ekki meina að hann sé næsti Jose Mourinho.

"Robinson er landsliðsmarkvörður Englendinga, svo hann er nú varla lélegur leikmaður. Ég vil gefa honum og öllum öðrum í hópnum sjálfstraust svo þeir þurfi ekki að spila undir svona mikilli pressu, en eitt er þó á hreini - það á enginn leikmaður fast sæti í byrjunarliðinu," sagði Ramos.

"Ég mun gera hlutina á minn hátt. Ég er Juande Ramos - ekki Jose Mourinho. Ég hef mínar ákveðnu vinnuaðferðir sem ég hef sýnt með góðum árangri hjá Sevilla og mig langar mikið að endurtaka leikinn hjá Spurs," sagði Ramos.