Hlusta á Take That til að koma sér í gírinn

Markvörðurinn David James hefur nú gefið upp leyndarmálið á bak við gott gengi Portsmouth í ensku úrvalsdeildinni.

Lærisveinar Harry Redknapp hafa byrjað vel í deildinni og stefna ótrauðir á Evrópusæti. David James segir að tónlistin sem þeir félagar hlusti á fyrir leiki spili stórt hlutverk í að koma mannskapnum í stuð og segir miðjumanninn Sulley Muntari vera plötusnúð númer eitt.

"Sulley tók við hlutverki plötusnúðs eftir að Gary O´Neill fór til Boro. Hann er alltaf með iPodinn sinn á fullu og spilar alvarlega skelfilega tónlist. Fyrir tveimur vikum spilaði hann syrpu með lögum frá níunda áratugnum og þar á meðal tónlist Take That - það virðist virka vel fyrir okkur," sagði James í samtali við Daily Mail.