Tottenham mætir harðri gagnrýni

Forseti Sevilla segist ætla að senda knattspyrnuyfirvöldum bréf þar sem fram kemur að Tottenham hafi með ólögmætum hætti sett sig í samband við þjálfarann Juande Ramos á dögunum. Ramos skrifaði undir samning við Tottenham í gær.

Forsetinn segir að forráðamenn Tottenham hafi sett sig í beint samband við þjálfarann í stað þess að ræða við sig - og að það brjóti reglur um ólögmætar viðræður við samningsbundinn þjálfara.

"Ef Tottenham vildi Ramos, hefði það átt að tala við mig en ekki beint við hann. Ég mun greina FIFA og UEFA frá þessu," sagði forsetinn í samtali við Sunday Express.

Blaðið segir Sevilla heimta 3,5 milljónir punda í miskabætur frá Tottenham fyrir að leyfa þjálfaranum að losna undan samning sínum.

Forseti Sevilla er ekki eini maðurinn sem er ósáttur við vinnubrögð Lundúnafélagsins, því Ken Bates, stjórnarformaður Leeds, er líka mjög ósáttur við að hafa heyrt það "úti í bæ" að aðstoðarstjóri hans Gus Poyes væri farinn í viðræður við Tottenham.

Þá hefur brottrekstur Martin Jol frá Tottenham verið gagnrýndur harðlega og hann sagði blaðinu The People að frændi sinn hefði sagt sér að ætti að reka sig í miðjum leik Tottenham og Getafe. "Það var frændi minn sem sagði mér þessi tíðindi eftir leikinn við Getafe og þá virtust allir vita þetta nema ég. Það er kjaftæði að ég hafi vitað það fyrir leikinn að ætti að reka mig," sagði Jol.

Hann vill ólmur halda áfram að vinna á Englandi en neitar því að hafa rifist heiftarlega við stjórnarformann Tottenham eftir brottreksturinn. "Ég er ekki í deilum við Daniel Levy eða neinn annan hjá félaginu því þeir komu vel fram við mig þann tíma sem ég var hjá félaginu. Ég ætla að taka mér smá frí en svo vil ég gjarnan halda áfram að vinna á Englandi. Ég á hús hérna og dóttir mín er í skóla hérna. Ég finn mig vel á Englandi," sagði Jol