Mourinho hefur komið illa fram við Shevchenko

Oleg Blokhin, landsliðsþjálfari Úkraínu, hefur ráðist harkalega að Jose Mourinho hjá Chelsea fyrir meðferð hans á framherjanum Andriy Shevchenko.

Shevchenko hefur aðeins skorað 3 mörk fyrir Chelsea í 20 leikjum og Blokhin segir að leikmaðurinn þurfi bara meiri tíma til að aðlagast leiknum á Englandi. "Það er eitt að stuðningsmenn og íþróttafréttamenn séu að gagnrýna Shevchenko, en þegar stjóri hans er farinn að gagnrýna hann líka - er nóg komið af svo góðu. Það er algjörlega út í hött," sagði Blokhin, sem sjálfur var einn besti leikmaður heimsins á sínum tíma.

Shevchenko sjálfur vill ekki gera mikið úr þessu, en viðurkennir að samband sitt við stjórann gæti verið betra. "Í ljósi orðinna atburða er ljóst að ég er að misskilja eitthvað af þeim skilaboðum sem stjórinn er að reyna að koma til mín og ég held að það komi í hlut stjórnar félagsins að greiða úr þeirri flækju," sagði Shevchenko.